Consulta da UE sobre Contidos en liña.

A Comisión Europea publicou un documento para reflexionar sobre o reto que supón a creación dun mercado único dixital de contidos creativos, tales como libros, música, películas ou videoxogos.

Segundo as súas estimacións, un mercado sen fronteiras para os contidos creativos podería dar lugar a que os ingresos polo miúdo do sector de contidos creativos se cuadriplicasen. A dispoñibilidade dixital de contidos encerra, polo tanto, grandes oportunidades para Europa, pero tamén algúns retos.

En primeiro lugar, as descargas ilegais a grande escala poden representar unha ameaza para o desenvolvemento dun mercado único de contidos dixitais viable dende o punto de vista económico. Para previr esta situación habería que fomentar as ofertas transfronteirizas legais. Ademais, persisten determinados obstáculos regulamentarios e territoriais que dificultan a distribución dixital dos produtos e servizos culturais, o que pode supoñer un impedimento para a creatividade e a innovación.

O documento considera tamén os desafíos aos que deben facer fronte tres grupos diferenciados: os titulares dos dereitos, os consumidores e os usuarios comerciais. Para eles, a Comisión Europea puxo en marcha unha consulta pública co obxectivo de recoller achegas que contribúan a impulsar un mercado máis dinámico para a distribución en liña de contidos creativos.

O prazo para remitir comentarios ao respecto finaliza en xaneiro de 2010.

Noticia publicada en prensa (23-10-2009)